Taalsosjologyske gegevens no foar elk beskikber!

Hawwe jo altyd al witten wold hoefolle persint fan 'e Friezen Frysk praat tsjin harren húsdokter; hoefolle bern yn 'e jierren tachtich yn 'e Dongerdielen de wurden op 'e krekte wize brutsen en hoefolle persint fan 'e ûnderfrege persoanen har yn 1980 yn it foarste plak as Fries beskôgen ... dan leit hjir no de kâns foar jo!!

De Fakgroep Sosjale Wittenskippen fan 'e Fryske Akademy hat de gegevens fan in tal nijsgjirrige taalsosjologyske ûndersiken tagonklik makke foar elk dy't niget oant it Frysk hat of sels ûndersyk docht nei de Fryske taalsitewaasje.

Proseduere en betingsten

Hawwe jo belangstelling foar ien of mear bestannen, nim dan kontakt op mei ús dokumintalist/ynformaasjespesjalist Peter van der Meer. Eventuele kosten sille (fansels nei oerlis) yn rekken brocht wurde. Boppedat sille jo oanjaan moatte wêr't jo it materiaal foar brûke sille.

De bestannen binne yn fjouwer skiften ûnder te bringen:

Oerheid

• Provinsjale amtners en it Frysk (1985)

• Provinsjale amtners en it Frysk (1993)

• Enkête NIPO Steateferkiezings (1987)

• Enkête Fryske taal yn it rjochtsferkear (1991)

De provinsjale amtners en it Frysk (1985)

Op inisjatyf fan in spesjale wurkgroep fan de provinsjale griffy is yn 1985 in ûndersyk útfierd troch beliedsmeiwurker Gerlof Kootstra nei de taalferhâldingen binnen it provinsjale apparaat. By it ûndersyk waard oparbeide mei Durk Gorter en Jehannes Ytsma, taalsosjologen fan de Fryske Akademy.

747 respondinten.

De provinsjale amtners en it Frysk (1993)

Deputearre Steaten fan Fryslân hawwe oan de Fryske Akademy frege om ûndersyk te dwaan nei de taal yn de provinsjale organisaasjes, nei't dêryn sûnt 1985 taalbelied fierd is. Yn 1993 is mei dat doel in skriftlike enkête oer taalgedrach, meidwaan oan kursussen Frysk en taalhâlding ûnder de provinsjale amtners hâlden. In part fan de útkomsten fan dy enkête wurdt fergelike mei in soartgelikens - mar beheinder - ûndersyk út 1985.

495 respondinten

Enkête NIPO Steateferkiezings (1987)

Yn opdracht fan de Fryske Akademy, Radio Fryslân en it Frysk Deiblêd hat it enkêteburo NIPO op 24 en 25 febrewaris 1987 in opiny-ûndersyk holden ûnder 598 persoanen fan 18 jier en âlder. It doel fan it ûndersyk wie om yn it foar ynsjoch te krijen yn de stimmeferdieling foar de Steateferkiezings fan 18 maart 1987. Ek binne guon oare dingen oangeande Fryslân en it Frysk befrege.

Enkête Fryske taal yn it rjochtsferkeer (1991)

Yn opdracht fan de Rijkscommissie Friese taal is yn 1991 troch de Fryske Akademy in skriftlike enkête hâlden y.f.m. in advys oangeande it brûken fan de Fryske taal yn it rjochtsferkear. Sintrale tema's yn it ûndersyk wiene: it feitlik brûken fan it Frysk as rjochtstaal, de Fryske taalfeardigens fan 'e juridyske beropsbeoefeners en hoe't tsjin it Frysk yn it rjochtsferkear oansjoen waard.

321 en  366 respondinten.

Taal

• De Friezen en harren taal (1967)

• Taal yn Fryslân I (1980)

• Taal yn Fryslân II (1994)

• Taal yn it grinsgebiet: Gruttegast en Mearum (1984)

• Taalsituaasje It Hearrenfean (1984)

• Enkête it Leewarders (1988)

• Taalenkête 'Ljouwerter Krante' (1991)

• Taalgebrûk helpferliening (1994)

• Undersyk Fryske side LC en FD (1994)

• Undersyk 'De grens voorbij' (1996)

Underwiis

• Brekkingsûndersyk yn it leger ûnderwiis yn de Dongeradielen (1983)

• Brekkingsûndersyk yn it fuortset ûnderwiis yn de Dongeradielen (1986)

• Underwiis Frysk op basisskoalle (1988)

• Frysk as earste en twadde taal; bern (1990)

• Frysk as earste en twadde taal; âlden (1990)

• Enkête lêsbefoarderingsprojekt 'Lêspiramide' (1996)

• Evaluaasje 'Fryske TaalRotonde' (1997)

• Attitude Alden trijetalige skoalle (2000)

Ferskaat

• Enkête Friezen om utens (1992)

• Jongerein yn Fryslân (1993)

• Krystkongres Frjentsjer (1987)

• Enkete iepen dei Fryske Akademy (1992)

Enkête Friezen om utens (1992)

Yn 'e maitiid fan 1992 is troch L.G. Jansma en G. Jelsma ûndersyk dien nei it taalgedrach en taalbehâld fan de Friezen om utens, dy't lid binne fan Fryske kriten en Fryske studinteferienings yn Nederlân. Om't hjir giet om migranten, is ek sjoen nei migraasjemotiven en nei oanpassing fan de migranten yn har nij fermidden. It ûndersyk waard dien troch in enkête te stjoeren nei alle (leden fan) kriten en studinteferienings; mear as 3.000 enkête-formulieren kamen werom.

Yn it ûndersyk stienen twa fragen sintraal: yn hoefier slagje de Bûtenfriezen deryn om har memmetaal te hanthavenjen en oer te dragen op de folgjende generaasje en hoe is de migraasje fan de Friezen om utens ferrûn en hoe gie it mei de yntegraasje yn it nije wenplak?

3006 respondinten

Jongerein yn Fryslân (1993)

Dit ûndersyk is útfierd yn opdracht fan de Provinsje Fryslân om ynsjoch te krijen yn it hâlden en dragen fan de Fryske jongerein oangeande wurk en wurkleazens, libbens- en wenomkriten, bining oan Fryslân en behearsking fan it Frysk, omgean mei jild en besteging fan de frije tiid, ensfh. Fia in telefoanyske enkête binne yn maaie en juny 1993 fan 707 jongelju tusken de 16 en 26 jier garre.

Krystkongres Frjentsjer (1987)

Yn desimber 1987 is troch Durk Gorter en Jehannes Ytsma, taalsosjologen fan 'e Fryske Akademy, in enkête oer it taalbehâld holden. Dat barde op it Krystkongres te Frjentsjer dat doe ûnder it motto "Help it Frysk fersûpt! Wêr is de reddingsboat?" holden is.

73 respondinten

Enkête iepen dei Fryske Akademy (1992)

De Fryske Akademy hat op 11 oktober 1992 in iepen dei holden. Der kamen krapoan 400 minsken op ôf. Oan alle besikers fan 18 jier en âlder waard in enkêteformulier jûn.

233 respondinten

Oersjoch systemfiles

(mei in koarte gearfetting)